Thumbnail

წინსვლა ფიფას რეიტინგში - საქართველოს ანდორა-ლატვიასთან მოგებები დაუფასდა

ლუკა გაბიდაური პროფილის ფოტო
ლუკა გაბიდაური
  • ფიფამ განახლებული სანაკრებო რეიტინგი გამოაქვეყნა
  • საქართველომ რეიტინგში ერთი საფეხურით წაიწია და 92-ეა
  • რეიტინგის სათავეში ბელგიაა, მსოფლიოს ჩემპიონი კი მეორეა

ფიფამ სანაკრებო რეიტინგი განაახლა. ოქტომბრის რეიტინგში საქართველო ერთი საფეხურით დაწინაურდა და 1265 ქულით ამჟამად 92-ე პოზიციაზეა. 

ვლადიმირ ვაისის გუნდისთვის უეფას ერთა ლიგაში ასპარეზობა წარმატებული გამოვიდა - 4 მატჩიდან 4 მოგება! ბოლო ორი მატჩი კი ნაკრებმა სწორედ ოქტომბერში ჩაატარა და ორივე ერთნაირი ანგარიშით - 3:0 მოიგო, შინ ანდორასთან და სტუმრად ლატვიასთან. შედეგად, ვაისის გუნდმა ჯგუფში პირველი ადგილი, პლეი ოფში თამაში და C დივიზიონში აღზევება გაინაღდა. ანდორასა და ლატვიასთან გამარჯვება ფიფას რეიტინგში 10 ქულით დაფასდა.

უეფას ერთა ლიგაში საქართველოს ნაკრების მეტოქეების რეიტინგები: ყაზახეთი (117-ე ადგილი), ლატვია (132), ანდორა (133).

საქართველოს ნაკრები ერთა ლიგის ჯგუფში დარჩენილ ორ მატჩს ნოემბერში ჩაატარებს - 15-ში სტუმრად ანდორას დაუპირისპირდება, 19-ში კი ყაზახეთს უმასპინძლებს.

ფიფას განახლებულ რეიტინგს ერთპიროვნულად ლიდერობს ბელგიის ნაკრები (1733 ქულა), მსოფლიოს ჩემპიონი საფრანგეთი (1732) კი მეორე ადგილზეა. ტოპ-ათეულში ადგილები გაცვალეს ინგლისმა და ურუგვაიმ. ინგლისელები 1619 ქულით მეხუთეზე აღზევდნენ, ურუგვაელები კი 1617 ქულით მეექვსეზე ჩამოქვეითდნენ.

ფიფას რეიტინგის საუკეთესო ათეული

1 (1). ბელგია - 1733 ქულა 
1 (1). საფრანგეთი - 1732 
3 (3). ბრაზილია - 1669
4 (4). ხორვატია - 1635
5 (6). ინგლისი - 1619
6 (5). ურუგვაი - 1617
7 (7). პორტუგალია - 1616
8 (8). შვეიცარია - 1598 
9 (9). ესპანეთი - 1594 
10 (10). დანია - 1584 

ოქტომბერში ყველაზე დიდი პროგრესი გიბრალტარს აქვს (+8 საფეხური), რომელმაც ამ თვეში ისტორია დაწერა - პირველი ოფიციალური მატჩები მოიგო (სომხეთსა და ლიხტენშტაინთან). ამჟამად გიბრალტარი ფიფას რეიტინგში 190-ეა. ყველაზე დიდი რეგრესი მოზამბიკს აქვს, რომელიც 9 საფეხურით დაქვეითდა და 122-ე პოზიციაზეა. ფიფას რეიტინგი 29 ნოემბერს განახლდება.

კომენტარები

ბოლო ამბები