Thumbnail

'ამას ვერც კი წარმოვიდგენდი' - ნიკა ამაშუკელი ექვს ერზე იმსაჯებს

დათო მანჯავიძე პროფილის ფოტო
დათო მანჯავიძე
  • 'მეორე დონის ქვეყნის წარმომადგენლისთვის ეს პირველი პრეცედენტია'
  • ამაშუკელი მთავარი არბიტრი იქნება ირლანდია-იტალიის მატჩზე

2021 წლის საქართველოს საუკეთესო სარაგბო მსაჯი ახალი წლიდან ახალ ისტორიას წერს. ნიკა ამაშუკელი ე.წ. მეორე დონის ქვეყნებიდან პირველი არბიტრი გახდა, რომელიც ექვსი ერის კარს შეაღებს და თებერვალში ორ თამაშს იმსაჯებს.

6 თებერვალს, 2022 წლის ექვსი ერის პირველ ტურში, ის საფრანგეთისა და იტალიის მატჩზე რეფერის პირველი ასისტენტი იქნება, ხოლო 27 თებერვალს, მესამე ტურში, ირლანდიისა და იტალიის შეხვედრას უკვე მთავარი არბიტრის როლში მოემსახურება.

მნიშვნელოვანია, რომ ამ უძველეს, თითქმის 140-წლიანი ისტორიის მქონე ტურნირში, ამაშუკელი 2023 წლის მსოფლიო თასის წინ მიიწვიეს. თებერვალ-მარტში ევროპის უძლიერეს ჩემპიონატში სულ 15 თამაშია. შესაბამისად, შეირჩა ამ მომენტისთვის 15 უძლიერესი რეფერი და სასიხარულოა, რომ მათგან ერთ-ერთი ქართველია. თავად ნიკა ამ დანიშვნას მოულოდნელს უწოდებს:

“ვერც კი წარმოვიდგენდი ექვს ერის ცენტრში თუ მომიწევდა მსაჯობა. ლოგიკური იქნებოდა, თუ მხოლოდ გვერდით მსაჯად მივიღებდი დანიშვნას, მაგრამ სრული შოკი იყო, როდესაც ჟოელ ჟუშმა დამირეკა და მითხრა – 27 თებერვალს ირლანდიისა და იტალიის მატჩს ცენტრში იმსაჯებ. ექვს ერზე პრესტიჟული ტურნირი არ არსებობს და მის ნაწილად ყოფნა უდიდესი პატივია, მით უმეტეს მეორე სარაგბო დონის ქვეყნის წარმომადგენლისთვის, რისი პრეცედენტი აქამდე არასდროს ყოფილა.

ბედნიერი ვარ, რადგან ასეთი კონკურენციის ფონზე 15 საუკეთესო მსაჯს შორის შემარჩიეს. უფრო მეტად კი მახარებს ის, რომ არა მხოლოდ ქართულ რაგბს, არამედ მთელს ქვეყანას წარმოვადგენ. რაგბში მსაჯი წარმოუდგენელი მნიშვნელობის ფიგურაა, მუდამ ყურადღების ცენტრშია და ვეცდები ღირსეულად გავართვა თავი დაკისრებულ მოვალეობას.

ასევე ეს დანიშვნა უნდა გახდეს მოტივაცია ტიერ2 ქვეყნის წარმომადგენლებისთვის, რომ მუშაობით მეტის მიღწევა შესაძლებელია. გული მხოლოდ იმაზე მწყდება, რომ ყველა ქართველისთვის სანატრელ ტურნირზე ჯერჯერობით მხოლოდ მე ვიქნები წარმოდგენილი და არა – ჩვენი გუნდი. იმედია, ეს დანიშვნა გახდება წინაპირობა და ქართული რაგბი დაიწყებს სვლას ამ სისტემისა და ტურნირისკენ“.

ნიკა ამაშუკელი გასული წლის ნოემბერში დუბლინში ირლანდია-იაპონიის მატჩსაც მოემსახურა

ამაშუკელის ექვს ერში მიწვევას ქართული რაგბის დაფასებად მიიჩნევს რაგბის კავშირის აღმასრულებელი დირექტორი ბაჩო ხურციძე:

"ნიკას ასეთი დონის თამაშებსა და ტურნირებში მიწვევა, მასთან ერთად, ქართული რაგბის დაფასებაცაა. ჩვენ გვაქვს პრეტენზია, რომ სარაგბო ერი ვართ და ამ დროს ასეთი დანიშვნა უმნიშვნელოვანესია. ვულოცავ ნიკას ამ წარმატებას. პირადად ის, უკვე დიდი ხანია აღარ ითვლება ტიერ2 ქვეყნის წარმომადგენლად და შესულია მსოფლიოს საუკეთესო მსაჯების სიაში.

მისი წარმატება საუკეთესო მაგალითია იმ ბიჭებისთვის, ვინც ახლა იწყებს, ან ფიქრობს ერთი შეხედვით არაპრესტიჟული პროფესიის, მსაჯობის დაწყებას. რეალურად, თანამედროვე რაგბში მსაჯი ყველაზე მნიშვნელოვანი ფიგურაა და წლების წინ რაგბის კავშირმა ამ მიმართულებით დიდი ინვესტიციები განახორციელა.

ნიკამ ამ წარმატებას თავისი ნიჭისა და თავდაუზოგავი შრომის ფასად მიაღწია. მისი წინსვლა არა მხოლოდ ქართული რაგბის განვითარებას, არამედ ქვეყნის წარმოჩინებას უწყობს ხელს. ქართველი მსაჯის ისეთი დონის ტურნირში მიწვევა, როგორიც ექვსი ერია, არა მხოლოდ ქართული რაგბის, არამედ მთელი ქვეყნის პრესტიჟია“.

ამგვარად, ისე გამოდის, რომ საქართველოს საუკეთესო რაგბის მსაჯს ქვეყნიდან დიდი ხნით მოუწევს წასვლა და ეროვნულ ჩემპიონატს – დიდ 10-საც ძალიან დააკლდება. როგორც ცნობილია, იანვრის ბოლოს ამაშუკელი პირველი ქართველი არბიტრი გახდება, რომელიც 7-კაცას მსოფლიო სერიაზე, მალაგას ეტაპზე იმსაჯებს, მერე კი ექვსი ერია.

კომენტარები

ბოლო ამბები