Thumbnail

აკი ბაშო | ტოჩინოშინმა 4-დღიანი წარუმატებელი სერია შეწყვიტა

დათო მანჯავიძე პროფილის ფოტო
დათო მანჯავიძე
  • ქართველმა სუმოისტმა იაპონელი იუტაკაიამა იორიკირით დაამარცხა
  • ტოჩინოშინის მომდევნო მეტოქე მისი ძველი ნაცნობი ბრაზილიელი კაისეია

33 წლის ქართველმა სუმოისტმა ლევან გორგაძემ იგივე ტოჩინოშინმა 4-დღიანი წარუმატებელი პერიოდი შეწყვიტა და იაპონიის დედაქალაქ ტოკიოს “რიოგოკუ კოკუგიკანში” მიმდინარე შემოდგომის სუპერტურნირზე მე-2 გამარჯვება იზეიმა.

ტოჩინოშინი აკი ბაშოს დასავლეთის მე-12 მაეგაშირას წოდებით შეხვდა და კარგ ფორმაში ნამდვილად არ იმყოფება, თუმცა, დასავლეთისვე მე-14 მაეგაშირა იუტაკაიამასთან ორთაბრძოლაში მისი უპირატესობა აშკარა იყო და აღნიშნულ მეტოქეს ზედიზედ მეხუთედ აჯობა. ქართველმა სეკიტორმა 27 წლის იაპონელი ტავარასთან მიიყვანა და დოჰიოდან იორიკირით გაიყვანა.

ტოჩინოშინის მაჩვენებელი 2 მოგება და 4 მარცხია, მისი მომდევნო მოწინააღმდეგე კი აღმოსავლეთის მე-14 მაეგაშირა, 34 წლის ვეტერანი კაისეი იქნება. ქართველ და ბრაზილიელ სუმოისტებს დაპირისპირების დიდი ისტორია გააჩნიათ და ურთიერთშეხვედრებში მცირე უპირატესობა ტოჩინოშინს გააჩნია – 13 მოგება, 10 მარცხი.

კომენტარები

ბოლო ამბები