მილანის ანტირეკორდი, ლოჩოშვილმა ზაგრების დინამოსთან წააგო

მილანი ლილთან დამარცხდა, ''როსონერის'' ანტირეკორდი ''სან სიროზე''
ლუკა ლოჩოშვილის ვოლფსბერგერმა ზაგრებში 10 კაცით წააგო

ევროპალიგის მესამე ტურის საღამოს მატჩებში ყველაზე დიდ ინტერესს მილანისა და ლილის დაპირისპირება იწვევდა. სტეფან პიოლის გუნდს 28-მატჩიანი წაუგებელი სერია ჰქონდა, რომელიც სწორედ ფრანგულ კლუბთან დასრულდა. კრისტოფ გალტიეს ფეხბურთელებმა მილანს 3:0 სძლიეს. სამივე გოლი თურქი იაზიჯის ანგარიშზეა. ის პირველი ფეხბურთელი გახდა, რომელმაც მილანს ''სან სიროზე'' ჰეთთრიკი შეუსრულა.

სტეფანო პიოლის გუნდმა ანტირეკორდიც დაამყარა. მილანი ევროტურნირზე, საკუთარ მოედანზე, სამი ბურთი სხვაობით პირველად დამარცხდა.

მილანი 0:3 ლილი

გოლები: 0:1, 0:2, 0:3 იაზიჯი (პენ-22, 55, 58)

არსენალმა ჯგუფში მესამე გამარჯვება იზეიმა. ''მეთოფეებმა'' ნორვეგიულ მიოლდეს 4:1 სძლიეს და 9 ქულა დააგროვეს. არტეტას გუნდს ერთი ქულა სჭირდება, რათა მომდევნო ეტაპზე ითამაშოს.

არსენალი 4:1 მიოლდე

გოლები: 0:1 ელინგსენი (22), 1:1 ჰაუგენი (ა.გ 45+1), 2:1 სინიანი (ა.გ 62), 3:1 პეპე (69), 4:1 ვილოკი (88)

მარტივად მოიგო კიდევ ერთმა ინგლისურმა კლუბმა. ლესტერმა პორტუგალიურ ბრაგას 4 უპასუხო გოლი გაუტანა. ამ გუნდმაც ჯგუფიდან გასვლა, ფაქტობრივად, გაინაღდა.

ლესტერი 4:0 ბრაგა

გოლები: 1:0, 2:0 იჰენაჩო (21, 48), 3:0 პრაეტი (67), 4:0 მედისონი (78)

სამწუხაროდ, ლუკა ლოჩოშვილის ვოლფსბერგერი ზაგრების დინამოსთან სტუმრად 0:1 დამარცხდა. ქართველმა მცველმა მოედანზე 90 წუთი გაატარა. მისი გუნდი პირველი ტაიმის ბოლოს 10 კაცით დარჩა და მეორე ტაიმში მეტოქის შეტევებს ვეღარ გაუძლო. ავსტრიულ კლუბს 4 ქულა აქვს და ჯგუფში მეორე ადგილზეა. მე-4 ტურში ზაგრების დინამო უკვე ავსტრიაში ჩადის.