Thumbnail

უმცროსი ბორჯღალოსნები საფრანგეთში არიან – 2 ტესტი ჩემპიონთან

დათო მანჯავიძე პროფილის ფოტო
დათო მანჯავიძე
  • საქართველოს 20-წლამდელთა ნაკრებს რთული ტესტები ელის
  • მაისურაძის გუნდი ახალგაზრდული მსოფლიო თასისთვის ემზადება

უმცროსი ბორჯღალოსნები გუშინ საფრანგეთში გაემგზავრნენ, სადაც ადგილობრივ 20-წლამდელთა განვითარებად ნაკრებთან ორ საკონტროლო თამაშს გამართავენ. ამ ინფორმაციას საქართველოს რაგბის კავშირის პრესსამსახური ავრცელებს.

ახალგაზრდული მსოფლიოს ჩემპიონატის ბოლო ორგზის გამარჯვებულის წინააღმდეგ 30 მორაგბე ითამაშებს, რომელთაგან 16 მორკინალი და 14 ხაზის მოთამაშეა. მათგან 22 ქართული კლუბებიდანაა, 8 კი ლეგიონერია.

შემადგენლობაშია გუნდის კაპიტანი დემე თაფლაძეც, რომელსაც გუშინ ბორჯღალოსნების რიგებში ბელგიასთან დებიუტი ჰქონდა და უმცროს ბორჯღალოსნებს მოგვიანებით შეუერთდა.

“საფრანგეთში ლეგიონერებსაც დავაკვირდებით. არიან მორაგბეები, რომელთაც ჩვენთან ერთად სხვადასხვა მიზეზების გამო ჯერ არ უთამაშიათ და გვაინტერესებს როგორ ჩაჯდებიან ჩვენს სისტემაში.

ამ ორი თამაშის შემდეგ, გვექნება რეალური სურათი და ყველა პოზიციაზე გაიზრდება კონკურენცია. რთულ თამაშებს ველით და შეთამაშების გარდა, ვეცდებით, მეტოქესთან შარშანდელი მარცხის გამო რევანში ავიღოთ“ – ამბობს მაისურაძე.

საფრანგეთის 20-წლამდელთა განვითარებადი ნაკრები ასევე 30 მორაგბით გვხვდება. მასპინძელთა პირველი გუნდი 20-წლამდელთა ექვს ერში თამაშობს, თუმცა ჯერჯერობით უცნობია რა შემადგენლობით ითამაშებს ეს გუნდი იტალიაში დაგეგმილ მომავალ მსოფლიო თასზე.

შეგახსენებთ, რომ საქართველოს ნაკრებმა დეკემბრის დასაწყისში თბილისში სამხრეთ აფრიკელ თანატოლებთან ორი საკონტროლო თამაში გამართა, მას შემდეგ კი, გუნდს შევარდენზე ორი შეკრება ჰქონდა, ოღონდ ლეგიონერების გარეშე:

“ხშირად გვიწევს შეკრება, რათა მორაგბეებს შევახსენოთ ის სისტემები, რომელთა დანერგვას ვცდილობთ. ვფიქრობთ, რომ საფრანგეთთან თამაშებისთვის კარგად ვართ მომზადებული. ეს მატჩები მოთამაშეთა შემოწმებას და კონკურენციის ამაღლებას ემსახურება.

დაგვრჩა კიდევ რამდენიმე მორაგბე, რომელთაც აფრიკულ შეკრებაზე შევამოწმებთ და ამის შემდეგ ჩამოვყალიბდებით იმ შემადგენლობაზე, რომელიც ახალგაზრდული ჩემპიონატისთვის მოემზადება“ – დასძენს მთავარი მწვრთნელი.

საქართველოსა და საფრანგეთის ნაკრებები ერთმანეთს ლილის მახლობლად, ბერგში, 26 თებერვალსა და 1 მარტს შეხვდებიან.

უმცროსი ბორჯღალოსნები საფრანგეთში

შერკინება: ლუკა ახვლედიანი (არმაზი), დავით აბდუშელიშვილი (რასინგ 92, საფრანგეთი), ირაკლი მჭედლიძე (ლელო-სარასენსი), ლუკა პეტრიაშვილი (ხვამლი), საბა ხონელიძე (აია), ალექსი ჭიჭიაშვილი (მონპელიე, საფრანგეთი), ხვიჩა ცოფურაშვილი (სტად ფრანსე, საფრანგეთი), დავით გვიდიანი (ორიაკი, საფრანგეთი), ლუკა მაჭარაშვილი (ორიაკი, საფრანგეთი), ვლადიმერ ჩაჩანიძე (ბაიონა, საფრანგეთი), ლუკა ივანიშვილი (ჯიქი), იოანე იაშაღაშვილი (ბაიონა, საფრანგეთი), ბექა ყორიაული (ლელო-სარასენსი), საბა კურტანიძე (ხვამლი), თორნიკე ზაქარიაძე (ლელო-სარასენსი), ანდრო ღარიბაშვილი (ხარები);

ხაზი: გიორგი მარგალიტაძე (ლელო-სარასენსი), გუგა მარგველაშვილი (აია), ლუკა მატკავა (არმაზი); სანდრო მარგიანი (აკადემია), ლაშა ლომიძე (აია), ირაკლი სიმსივე (აია), გივი ცინცაძე (არმაზი), დემურ თაფლაძე (ლელო-სარასენსი), ლუკა ხეხელაშვილი (ლელო-სარასენსი), თემურ კოხოძე (აია), დაჩი პაპუნაშვილი (ორიაკი, საფრანგეთი), დავით ნინიაშვილი (ხვამლი), ზურაბ ქავთარაძე (ხარები), ნიკა ცინცაძე (ხვამლი).

მთავარი მწვრთნელი: ილია მაისურაძე.

მწვრთნელები: ლადო კილასონია, ზურაბ ამონაშვილი, თორნიკე ბუბუტეიშვილი.

კომენტარები

ბოლო ამბები